Absa KKNK nooi jong skrywers uit om deel te neem aan teksontwikkeling

17 Mei 2013

As die skrywersgogga behoorlik gebyt het en jy voel jou pennevrug het die vermoë om gehore te bekoor en te vermaak, is die Absa KKNK en die Dagbreek Trust se teksontwikkelingsprojek vir jou bedoel.

Die doel van die inisiatief is om nuwe dramaturge te ontwikkel en ’n stem te gee, sê Theo Kemp, programbestuurder van die Absa KKNK. “Skrywers wie se dramatekste nog nooit opgevoer, uitgesaai of gepubliseer is nie kan aan die inisiatief deelneem. Om die projek ook so toeganklik moontlik te maak word geen inskryfgeld gevra nie en word daar ook geen beperking op die aantal inskrywings per skrywer geplaas nie,” sê Kemp.

KANNA-TOEKENNINGS MET SWIER GEVIER

5 Mei 2013

Die hele ensemble van die grensverskuiwende teaterproduksie, Balbesit, is gistermiddag by die Mount Nelson Hotel in Kaapstad tydens die Absa KKNK se gesogte Kannas met die Brandhouse Kanna vir Beste Akteur-toekenning bekroon. Dit is die eerste keer dat ’n groep akteurs, en nie ’n individu nie, met hierdie toekenning wegstap. Teaterguru Saartjie Botha se stuk bestaan uit ’n rolverdeling van 24 en handel oor mans se versugting om gehoor te word in die hedendaagse Suid-Afrika. Hierdie drama, waarin musiek en fisieke teater vervleg word, val saam met Botha se Afrikaans Onbeperk vir haar Vernuwende Denke-verering by vanjaar se Kanna-toekennings.

Sandra Prinsloo is verder bekroon as beste aktrise vir haar uitnemende spel in die eenvrou-vertoning, Oskar en die Pienk Tannie, Hennie van Greunen se blitsverkoper-komedie Die Leo’s, waarin sy die verhoog deel met onder meer Tobie Cronje, en Liefde, Anna, wat handel oor die lewe van die veteraan-aktrise, Anna Neethling-Pohl. (Volledige lys wenners onderaan).

Boekeprojek in sy 15de jaar

18 April 2013

Skole en biblioteke oor die land heen ondervind deurlopend 'n ernstige tekort aan boeke as gevolg van onvoldoende fondse. Hierdie opvoedkundige instansies sukkel gevolglik om hul gemeenskappe te voorsien van gepaste leesstof wat nodig is om geletterdheid van jonk en oud te verbeter. Die RSG/Absa KKNK Boekeprojek spreek hierdie kwessie aan deur boeke in te samel vir minderbevoorregte gemeenskappe.

Dié projek, nou in sy 15de jaar, het deur die jare al meer as 'n miljoen boeke ingesamel, en in 2012 het die publiek se ruimhartige skenkings 56 404 boeke vir die projek bymekaargemaak.

Absa KKNK 2013: KANNA-NOMINASIES

8 April 2013

Met die grootste feesprogram in jare, het die Kannapaneel ’n reusetaak gehad om by die meer as 120 produksies, waarvan 52 gedebuteer het, in een week uit te kom. “Ondanks die uitdagings van skedulering en die noodsaak van energiedrankies by tye, was daar oorgenoeg produksies wat die Kannapaneel vir ure teen mekaar opgeweeg het,” sê Erns Grundling, sameroeper van dié paneel. Die Baanbreek-venue is veral uitgesonder as broeikas van kopverskuiwende teater.

Optredelys by Kaktus op die Vlaktes verander weens siekte

5 April 2013

Saterdag (6 April) se Kaktus op die Vlaktes by die Absa KKNK line-up verander weens siekte in twee van die band kampe. Southern Gypsey Queen en Shadowclub sal nie meer optree nie. Maar die nuus is nie alles sleg nie - Hilltop Live het daarin geslaag om Van Coke Kartel en Ryno Velvet in hulle plek te kry wat sal verseker dat alle fesgangers steeds saam met Fokofpolisiekar, Die Heuwels Fantasties, Prime Circle en Goodnight Wembley 'n opregte Rock 'n Roll show kan geniet. Hilltop Live en Absa KKNK wens almal 'n spoedige herstel toe.

Deel die vreugde van die kunste

4 April 2013

As aanbieder van die Absa KKNK, glo ons by Kuns Onbeperk dat as ’n mens aan die teater blootgestel is deur mense wat ’n waardering daarvoor het, sal jy waarskynlik lewenslange vreugde in die teater geniet. Ons moedig teaterliefhebbers dus aan om deel te neem aan ons Deel die vreugde van die Kunste-veldtog. Al wat verwag word, is dat iemand in jou binnekring, wat nog nooit die towerkuns van teater ervaar het nie, daaraan blootgestel word. Dit kan ’n vriend, ’n huishulp, ’n jong persoon of selfs ’n familielid wees. Op dié manier maak ons die kring van teaterliefhebbers groter. Die Absa KKNK se Deel die vreugde van die Kunste-veldtog is ’n uitbreiding van die Internasionale Vereniging vir Teater vir Kinders en Jongmense (Assitej) se Neem Vandag ’n Kind na die Teater-veldtog, en sal deur die loop van die jaar ook ander kuns-genres onder die breë gemeenskap bevorder.

SMS jou besonderhede na 079 310 3192 en ons stuur vir jou meer inligting.

Keurige klassieke musiek-program gee Sonnige Spaanse Sensasies

18 Maart 2013

Die Absa KKNK het vanjaar weereens 'n keurige klassieke musiekprogram.

Jan-Erik Swart, klassieke musiekkurator vir die fees het 'n interessante klankprogram bymekaargesit wat selfs 'n Spaanse flair aan die fees gaan gee.

Die Universiteit van Pretoria se Simfonie-orkes gaan smeulende Spaanse klanke laat hoor met die program, Sonnige Spaanse Sensasies. Die jong violis Emmanuel Bach gaan optree as solis in Lalo se Symphony Espagnole wat gehore sal meevoer na 'n ander wêreld. Verder sal werke soos Rodrigo se Canzonetta, Turina se Danzas Fantasticas en Albéniz se Asturias uitgevoer word - alles onder leiding van die bekende dirigent Eric Rycroft.

Beleef uitdaging en nuwe ervarings met Baanbreek-produksies by die Absa KKNK

18 Maart 2013

As jy op 'n sensoriese reis wil gaan met nie-verbale en eksperimentele teater, die Baanbreek-venue, by die Absa KKNK net die plek vir jou om te wees.

In 'n poging om die Absa KKNK-program meer feesganger-vriendelik te maak, het venues nou spesifieke identiteite gekry wat 'n aanduiding gee van die tipe produksies wat feesgangers daar kan verwag. "As jy van een produksie by 'n spesifieke venue hou, is die kans goed dat jy van die ander produksies by dieselfde venue ook sal hou, " sê Theo Kemp, programbestuurder vir die Absa KKNK

Vanjaar se vlagskipproduksie, wat geborg word deur die Absa KKNK, is Pruttel. Pruttel val onder die Baanbreek-sambreel en dit vertel die storie van tannie Van der Wat wat nou amper 94 jaar oud is. Sy het 'n kluisenaarsbestaan vir die afgelope 30 jaar gehad en word nou gereeld besoek deur Meals on Wheels. Die vrywilliger wat kos aflewer kan glad nie praat nie. Hy dien as spieëlbeeld vir die ou tannie se opgehoopte emosies van 'n lewe wat al lankal verby is. Die storie is relevant in vandag se lewe.

Johnny Biskit's die plek om te wees vir tieners

8 Maart 2013

Dit het niks met beskuitjies te doen nie. Dis nou die nuwe venue en uithangplek vir tieners by vanjaar se Absa KKNK, wat bekend sal staan as Johnny Biskit’s.

Die Johnny Bischoffsaal by die Oudtshoorn Junior Primêre Skool word vir die fees spesiaal omskep in 'n kuierplek vir tieners, ’n eie sosiale klub en uithangplek. Dit sal die Absa KKNK se enigste uithangplek vir tieners wees met ’n eie slapsitkamer, waar tieners kan ontspan met potspel, ’n jukeboks, ’n graffitimuur, ’n foto-kiosk met funky kostuums, ’n kroeg waar koeldrank en fop-kelkies te koop sal wees en dans elke aand.

Nog 'n nuutjie is ’n biegboom waar hulle hul geheime anoniem kan ophang.

Absa KKNK skitter met musiek-supersterre

6 Maart 2013

Zolani Mahola, Karen Zoid, Laurika Rauch en Dorothy Masuka in Dorothy | 60 jaar.

As musiek jou ding is, dan is die Absa KKNK die plek vir jou. By vanjaar se fees kan musiekliefhebbers kies en keur uit supersterre.

Een van die gewildste supersterre om na uit te sien, is Laurika Rauch. Sy tree op in die debuut musiekproduksie Dorothy / 60 Jaar. Dié produksie is 'n huldigingskonsert vir Dorothy Masuka, tydgenoot van Miriam Makeba en komponis van die bekende liedjie Pata Pata, en die onmiskenbare stempel wat sy afgedruk het op die Suid-Afrikaanse musiek-erfenis. Saam met Masuka sal Rauch, Karen Zoid, Zolani Mahola en die Africa Voices-koor op die verhoog verskyn. Gehore kan uitsien om van Rauch se bekendste liedjies, soos Stuur groete aan Mannetjies Roux, te hoor.

Roete 62 se talent word ge-'polish' vir die Absa KKNK

28 Februarie 2013

Pedro Kruger en Hennie van Greunen gaan van die 4de tot die 6de Maart die pad vat, al langs die gewilde Roete 62. Hulle is opsoek na die agt talentvolste jongmense langs dié roete vir hul nuwe produksie #checkityt@route62.

"Daai talent kan nou sing, dans, voordrag, dromme speel of selfs stand-up komedie wees," vertel Kruger. Hy is skoon uitasem oor die foon van opgewondenheid, maar is gedruk vir tyd want sy volgende repetisie begin oor 'n paar minute. Kruger en Van Greunen se teatermaatskappy is verantwoordelik vir verskeie groot produksies wat by vanjaar se Absa KKNK sal debuteer. Dit sluit in Die Leo's, wat bekende name soos Sandra Prinsloo en Tobie Cronjé op die verhoog sal hê, Droom met Elana Afrika wat volgens Kruger "die verf van mure af gaan sing", Die monster in die Gang en #checkityt@route62, met die talent van Roete 62 op die verhoog.

Moord en verkragting onder die soeklig by Absa KKNK

21 Februarie 2013

Toe Charles J. Fourie onlangs agter sy lessenaar ingeskuif het om sy jongste produksie Offer te skryf, sou hy nie kon raai dat dié produksie in 'n tyd sou afspeel wat Suid-Afrika se geweld-fenomeen opnuut die land in rou sou dompel nie. Of dalk is dit júís so voorspelbaar.

Offer se akteurs: Peter Butler, Dorette Potgieter, Leonard Moss, Charles van den Heever en Christia Visser

Die onlangse grusame groepsverkragting van Anene Booysen (17) in Bredasdorp en die skokkende skietvoorval waarin die sportheld Oscar Pistorius sy vriendin Reeva Steenkamp (30) na bewering vermoor het, is vorme van geweld wat Fourie vierkantig in die oë staar in dié toneelstuk.

Offer is 'n ontstellende en indringende teaterstuk wat die sinnelose geweld-fenomeen vanuit 'n historiese asook eietydse oog bekyk. Dit sal die gehoor laat nadink en besin oor hoe anders 'n persoon se lewe kon wees, as hy of sy nie blootgestel was aan geweld nie.

Karoo-landskappe is die verhoog by Absa KKNK

21 Februarie 2013

Sekere teaterstukke werk op enige verhoog. Dan is daar ander wat jy net in die Klein Karoo kan aanskou, soos die nuwe plekspesifieke produksie Bly, wat in April vanjaar by die Absa KKNK debuteer.

Plek- of omgewingspesifieke produksies is teaterstukke wat buite die teater plaasvind, binne 'n spesifieke landskap. In die geval van Bly, vervang Karoo-landskappe en 'n sonsondergang die verhoog.

Die 19de Absa KKNK is 'n fees van 'nuwe goed'

12 Februarie 2013

Die 19de Klein Karoo Kunstefees spog vanjaar met 52 debuutproduksies.

Mnr. Theo Kemp, programbestuurder van die fees, sê hierdie jaar is die program propvol "opwindende produksies, nuwe venue’s en is die program so saamgestel om iets vir almal se smake te waarborg".

Die 52 nuwe produksies vergelyk goed teenoor die aantal nuwe stukke van vorige jare. In 2010 was daar 32 debuutproduksies, in 2011 het dit gespring na 40 nuwe produksies en in 2012 was daar 37 nuwe stukke te sien. Daar is verder ook bykans 40 meer toneel- en musiekproduksies om van te kies.

19de Absa KKNK program bekend

28 Januarie 2013

Die Absa KKNK het by die programbekendstelling van die 19de fees ’n lywige program aangekondig wat 54 debuutproduksies insluit, sowel as produksies wat gehore elders in die land aan die praat gehad het.

Die Uitvoerende Hoof van die Absa KKNK, mnr. Brett Pyper, het by die Programbekendstelling, wat by die Kasteel in Kaapstad plaasgevind het, gesê vanjaar se fees bied ’n breër keuse van kuns en vermaak vir die hele gesin. “Daar is ’n groot toename in oorspronklike werke (54 debuutproduksies vanjaar teenoor 2012 se 37), waaronder 22 toneelstukke, 18 musiekteater en kontemporêre musiekproduksies, sewe klassieke musiekuitvoerings, vier spesiaal saamgestelde woordkunsprogramme, twee kraakvars kinderteaterstukke en een hoëprofiel nuwe dansteaterproduksie,” sê Pyper.

Plaaslike beeldhouer gekies as Kanna-maker

23 Januarie 2013

Die Absa KKNK het die beeldhouer en boorling van Oudtshoorn, Owen Claassen, aangewys om die nuwe Kanna-beeldjies vir die fees te maak. Uitnemendheid by dié jaarlikse fees word met die Kannas, wat ook as die Klein Karoo Oscars bekendstaan, beloon.

Marieke Prinsloo-Rowe het die afgelope vyf jaar die beeldjies gemaak wat in groot geeste soos Wilna Snyman, Louis van Niekerk, Adam Small, PG du Plessis en Jans Rautenbach se voorkamers ereplekke het.

NUWE BAADJIE VIR DIE ABSA KKNK

13 November 2012

Die Absa KKNK kry in 2013 ’n nuwe baadjie. Dié kunstefees word vir die 19de keer van Vrydag, 29 Maart tot Saterdag, 6 April 2013 op Oudtshoorn aangebied.

In ’n groot verandering verskuif die Huisgenoot Musiekplaas na jare weer terug na die REC (Oudtshoorn Krieketstadion) en drie groot musiekkonserte word oor die eerste drie aande van die fees daar aangebied.

Gratis kunswerksessies op Oudtshoorn

26 September 2012

Dertig inwoners van Oudtshoorn is dié week besig om hul vaardighede in visuele kunste op te skerp tydens drie opwindende, gratis werksessies wat deur internasionale kunstenaars aangebied word.

Staande, links na regs: Lola Lasrut-Bachs, Uhuru Kgope, Jackie Malgas, Francois Tiran, Janet Dixon, Brett Pyper, Alejandra Baltarez, Phillip Metz, Linda Marques-Wilson, Byron Matthews, Wilhelm Lotter
Voor. links na regs: Damien Harry, Gary Frier, Mogorosi Matshumi, Anne French
Foto: Jacques Swart, Oudtshoorn Courant

Brümmer wen Absa KKNK en dagbreek trust tekskompetisie

23 Augustus 2012

Willemien Brümmer, bekroonde joernalis, skrywer van die kortverhaalbundel Die dag toe ek my hare losgemaak het en agterkleindogter van CJ Langenhoven is as die eerste wenner van die Absa KKNK en die Dagbreek Trust se tekskompetisie aangewys. Brümmer het gewen met haar voorstel Aandlied.

Dié kompetisie is oopgestel aan alle skrywers – gevestig en opkomend - met die doel om nuwe Afrikaanse dramaturgstemme te ontgin. Brümmer is joernalis by Die Burger, Beeld en Volksblad se bylaag By en is vanjaar die Rykie van Reenen-genoot aan die Universiteit Stellenbosch, waar sy in die joernalistiek klasgee. Sy is al verskeie kere vir haar werk as joernalis bekroon, maar dit is die eerste keer dat sy haar hand aan ’n verhoogteks waag.

KOMPETISIE VIR DIE ONTWERP VAN NUWE KANNA-BEELDJIES

3 Augustus 2012

Uitnemende werk is sedert die Absa KKNK se ontstaan 19 jaar gelede op verskillende platforms by die fees beloon, totdat die Kanna-toekennings in 2001 geskep is as dié platform vir die erkenning en verering van topgehalte werk in verskillende genres by die fees. Die Absa KKNK is met hierdie ontwerpkompetisie op soek na ’n kunstenaar wat die beeldjies vir die volgende drie jaar kan ontwerp en vervaardig vir hierdie gesogte toekenningsgeleentheid.

Ses Kannas vir Hanekom se Babbel

7 Mei 2012

Die omgewingspesifieke teaterproduksie Babbel is die groot wenner by die twaalfde Kanna-toekennings van die Absa KKNK en het in ses van die van die tien kategorieë geseëvier.

Babbel, uit die pen van die teatergenie, Nicola Hanekom, is bekroon met die Absa Kanna vir Beste Debuutwerk en die Absa Herrie Kanna vir Kopverskuiwende werk, asook die ATKV Kanna vir Beste teateraanbieding. Hanekom is vir die derde jaar agtereenvolgens in die kategorie vir Beste Regie bekroon, na Lot (2011) en Betésda (2010). Tinarie van Wyk Loots het die Sarie Kanna vir Beste Aktrise ontvang vir haar spel in Babbel, terwyl Brendon Daniels met die Windhoek Lager Kanna vir sy spel in Babbel en Rooiland bekroon is. Babbel is die laaste in Hanekom se trilogie, wat oor die afgelope drie jaar twaalf Kannas ingepalm het.

ABSA KKNK 2012 ’N REUSESUKSES

12 April 2012

Die agtiende Absa KKNK (Klein Karoo Nasionale Kunstefees) het pas tot ’n einde geloop en word as ’n reuse artistieke én finansiële sukses beskryf.

Uitvoerende Hoof van die Absa KKNK, Brett Pyper, sê die bestuur van die fees is verheug dat die fees op verskillende vlakke as hoogs geslaagd beskryf kan word. “Vanjaar is ’n meervlakkige fees beplan en aangebied en met totale verkope wat tien persent hoër is as verlede jaar, ondanks ’n steeds uitdagende ekonomiese klimaat en hoë brandstofpryse, is ons baie gelukkig met hoe dit verloop het,” sê Pyper.

ABSA KKNK 2012: KANNA-NOMINASIES

10 April 2012

Die Kannas, of Klein Karoo Oscars, gee erkenning aan produksies van uitstaande gehalte by die Absa KKNK. Werk wat verrassend en vernuwend is en die gehoor op die punte van hul stoele óf op hul voete het. Al die produksies op die amptelike feesprogram kom in aanmerking vir ’n Kanna en vanjaar is daar benoemings in tien kategorieë.

Elke kategorie het drie nominasies. Dit is dus reeds ’n fladderende veer in die onderskeie kunstenaars en produksies se hoed om genomineer te word. Die wenners word op Sondag 6 Mei aangekondig in die Mount Nelson-hotel in Kaapstad.

Kaktus Op Die Vlaktes keer terug na Absa KKNK 2012, met vlymskerp optredes!

30 Maart 2012

Op Saterdag 7 April 2012, in samewerking met José Cuervo Tequila en MK vind die hernuwing van 'n feesgunsteling, Kaktus Op Die Vlaktes, by sy nuwe tuiste Jam Street amfiteater net buite Oudtshoorn plaas.

Histories was Kaktus Op Die Vlaktes se verhoog gasheer van Suid-Afrika se grootste musiek ikone. Hardebaarde soos Valiant Swart, Johnny Clegg, Miriam Makeba, Koos Kombuis, Jack Hammer, Johannes Kerkorrel, Anton Goosen het die weg gebaan vir FPK/Fokofpolisiekar, Corne & Twakkie, Mandoza en Prime Circle wat hierdie een dag opelug musiekviering gevestig het as 'n hoogtepunt van die Klein Karoo Nasionale Kunstefees.

ABSA KKNK BLY VOORSTE FEES

8 Maart 2012

Produksies wat direk verbind word met die Absa KKNK het vanjaar by kykNET se Fiësta-toekennings uitgeblink en dié fees se status as die land se voorste platform vir uitnemende artistieke werk in Afrikaans opnuut beklemtoon.

Die fees het 36 nominasies in 16 kategorieë waarvoor produksies, uitvoerings of uitstallings kwalifiseer, ontvang. Dertien uit die sestien kategorieë is gewen deur werk wat óf by die Absa KKNK 2011 gedebuteer of aangebied is, óf in 2012 as ko-produksies by die komende fees te sien gaan wees.

'n HULDEBLYK AAN REZA DE WET

6 Februarie 2012

Toe Reza de Wet in 1985 haar kreatiewe visie, perfek gevorm en in volle blom op ’n onvoorbereide en ietwat impotente Suid Afrikaanse teater-landskap losgelaat het, het sy ’n subtiele, maar ook radikale alternatief aangebied vir die agitprop en vermaak wat toe die norm op ons verhoë was. Van meet af aan, in wat ’n ryk en volgehoue loopbaan geword het, kon sy die publiek amuseer en ontsenu in gelyke maat deur ’n onderduimse stroom goud sowel as etter te myn uit ’n verrotte Afrikaner psige.

1985 was ’n heel ander plek toe as die Suid Afrika van nou.

AGTIENDE ABSA KKNK PROGRAM BEKEND

19 Januarie 2012

Die Absa KKNK (Klein Karoo Nasionale Kunstefees) het vandag (18 Januarie 2012) die program vir vanjaar se fees in Kaapstad bekendgestel. Dit sal vanjaar die agtiende keer wees wat die fees op Oudtshoorn, in die Klein Karoo, aangebied word.

Uitvoerende hoof van die Absa KKNK, Brett Pyper, sê vanjaar se fees beloof om voort te bou op die suksesse van die vorige byna twee dekades. “Die kunstefees op Oudtshoorn bied, soos altyd, kuns, vermaak en feestelike geselligheid in oorvloed. En in ’n jaar waarin daar meer as genoeg drama op die wêreld se ekonomiese verhoog ervaar is, het die Feesbestuur en verskeie vennote saamgespan om die fees bekostigbaar te hou. Die kaartjiepryse van die Rivierbuurt bly byvoorbeeld vanjaar presies dieselfde as verlede jaar, met die ouderdom vir gratis toegang wat verhoog word van 12 tot 15 jaar oud. Van die gratis aanbod by die fees sal die baie gewilde en kleurvolle Klein Karoo Feesparade, saam met verskeie ander projekte as deel van die Fees van geleenthede, feesgangers vermaak,” sê Pyper.

Groot toneel hoogtepunte by die Absa KKNK 2012 te wagte

14 Desember 2011

Die agtiende Absa KKNK vier weer die verskeidenheid van die kunste in die week van 31 Maart tot 7 April 2012, met groot toneel hoogtepunte wat die verbeelding sal aangryp.

Toneelliefhebbers kan uitsien na Nicola Hanekom se derde buitelugproduksie, Babbel, wat handel oor die nadraai van ’n revolusie waar taal verval en chaos tot gevolg het. Hanekom se bekroonde span, onder wie Tinarie van Wyk Loots, Brendon Daniels, Stian Bam, Bronwyn van Graan, Jacques Theron, Neels van Jaarsveld, Charisma Baday en Lerato Motshwarakgole is in hierdie sterk visuele teaterstuk, wat hierdie keer op ’n bult in Oudtshoorn afspeel, te sien. Hanekom se vorige toneelproduksies, Betésda in 2010 en Lot in 2011, is gesamentlik met ses Kanna- en twee Fiësta-toekennings bekroon.

Op Toer bereik vanjaar plaaswerkers en matrieks

16 November 2011

Absa KKNK Op Toer, een van die Absa KKNK se jaarlikse uitreikprogramme, is op 10 November 2011 by die Schoemanshoek NG Kerk bekend gestel. Vanjaar se Absa KKNK Op Toer fokus op die gevare van drankmisbruik in veral arm, landelike gemeenskappe.

Om dié boodskap tuis te bring gaan die Kambro Diggers-toneelgeselskap vir die volgende drie maande die toneelstuk, Klaas se Plaas, op plase in die Klein Karoo opvoer. Projekleier van die Kambro Diggers, William Phillipus, sê hulle beoog met Klaas se plaas om gehore te skok. “Ons moet dit by mense tuisbring dat drankmisbruik gevare en gevolge inhou,” sê Phillipus. Hy sê verder is dit ook een van hul doelwitte om mense in landelike gebiede te laat glo hulle is belangrik in die groter Suid-Afrikaanse samelewing.

NUWE BEMARKING- EN KOMMUNIKASIEBESTUURDER SLUIT BY ABSA KKNK AAN

7 November 2011

Brenden Ruiter, ’n boorling van Namakwaland, het hom op 1 November 2011 as Bemarking- en Kommunikasiebestuurder by die Bestuurspan van die Absa KKNK aangesluit. Ruiter het sy joernalistieke loopbaan as studentjoernalis by Die Burger in Kaapstad begin, waarna hy wye draaie in die joernalistiek gemaak het. Hy het ondermeer by die Media24-publikasies die TygerBurger, Die Burger Oos-Kaap, Sondag en die tydskrif Kuier gewerk. Voordat hy die pos in Oudtshoorn aanvaar het, was hy ’n sportverslaggewer en sportnuusleser vir OFM in Bloemfontein.

Absa KKNK kry nuwe kurator van Visuele Kuns

3 Oktober 2011

Sandra Hanekom, visuele kunstenaar van Piketberg, is aangestel as die nuwe Kurator van Visuele Kuns by die Absa KKNK.

“Ek voel baie gevlei en opgewonde oor die moontlikhede wat die Absa KKNK aan my as kurator bied. 'n Feeskurator is ’n kurator vir beide die publiek en kunstenaars, wat dit ’n baie uitdagende posisie maak”, vertel Hanekom. Sy beskou kuns as haar besigheid en erns. “Hierdie is nie net nog ’n projek van my nie, hierdie is dié projek waar ek my reputasie moet behou en ook daaraan moet bou. Kunstefeeste is uiters belangrik vir gevestigde kunstenaars en vir jong, opkomende kunstenaars bied feeste die geleentheid om op ’n nasionale platform uit te stal.”

Absa KKNK 2012 Program: Oproep om voorstelle

1 Julie 2011

Produksiehuise, kunstenaars en ander kunste-praktisyns kan nóú voorstelle indien vir optredes by die 18de Absa KKNK, wat van 31 Maart tot 7 April 2012 op Oudtshoorn aangebied word.

“Die Absa KKNK verwelkom voorstelle in 'n verskeidenheid van genres, waaronder drama, dans, musiekteater, musiek en visuele kuns, maar is veral ook geïnteresseerd in voorstelle wat by ons program van plek-spesifieke teater, Oudtshoorn Oraloor, ingesluit kan word; wat die sigbaarheid van ons kunsteprogram op straat verhoog en wat werk met temas wat die diversiteit in Afrikaans uitbeeld,” sê Brett Pyper, Uitvoerende Hoof van die fees.

Laetitia van Dyk nuwe Voorsitter van Absa KKNK

17 Mei 2011

Prof. Laetitia van Dyk is op 12 Mei 2011 eenparig tot voorsitter van die Absa KKNK se raad van direkteure verkies. Sy is tans hoof van die Sentrum vir Leierskapstudies by die Bestuurskool van die Universiteit Stellenbosch (US) en sal vanaf 1 Junie 2011 die voorsitter van die Departement van Ondernemingsbestuur aan dieselfde universiteit wees.

Prof. van Dyk, wat sedert 24 November 2006 op die direksie van die Absa KKNK dien, sê sy sien baie uit na haar nuwe rol by die fees. “Die Absa KKNK lê my na aan die hart en dit is vir my 'n voorreg om die leidende rol wat dié kunstefees oor die afgelope 17 jaar speel, verder uit te bou. Die kunste kom bymekaar by die Absa KKNK en oor die volgende jaar sal dit my fokus wees om met al ons verskillende rolspelers te besin oor die bevordering van die kunste.”

Absa KKNK 2011: hanekom en span maak wéér skoonskip

17 Mei 2011

Nicola Hanekom en haar buitelugproduksie, Lot, is - soos verlede jaar die geval was met Betésda - met drie gesogte Absa KKNK Kanna Toekennings bekroon. Die drie pryse vir Lot sluit in die Kanna vir die beste aanbieding, 'n bekroning vir Hanekom se regie van Lot én een as beste vroulike kunstenaar. Laasgenoemde Kanna sluit ook haar spel in Hennie van Greunen se toneelproduksie, WEES, in.

ABSA KKNK en Remgro bewaarheid drome in die Eden distrik

12 November 2010

Twee belowende jong kunstenaars vanuit die Eden Distriksmunisipaliteit se drome is bewaarheid, nadat hulle aangewys is as die ontvangers van die Absa KKNK se Remgro-beurs ter waarde van R50 000 elk, ter bevordering van hul loopbane in die kunste.

“Dié beurs gee my 'n kans om 'n tree nader aan my droom te gee”, vertel Sulayman Human, 'n pianis van Oudtshoorn, wat volgende jaar aan die Universiteit van Stellenbosch gaan studeer. Bradley Zeelie, 'n danser van George wat volgende jaar aan die Universiteit van Kaapstad gaan studeer, beskryf die beurs as sy deurbraak in die lewe. “Ek kry die geleentheid om my droom uit te leef en 'n sukses van my lewe te maak.”