Stalletjie-aansoekvorm

Watter tipe stalletjie verkies jy in die bogenoemde tabel? (merk jou keuse onder in voorkeur-volgorde van 1 tot 3.).

Indien jy aansoek doen vir ’n buite-stalletjie, dui duidelik aan wat die algehele grootte van jou stalletjie is (afdak, sleephaak, advertensieborde, aanpaskamer ens. ingesluit).

KKNK 2026: BEPALINGS EN VOORWAARDES VIR STALLETJIES

AANSOEKE 

• Lees alle inligting noukeurig deur.
• Een aansoek verteenwoordig een stalletjie of aaneenlopende dubbelstalletjie. Twee aansoeke moet dus ingedien word vir twee aparte stalletjies.
• ’n Nie-terugbetaalbare administrasiefooi van R350 (BTW ingesluit) word per aansoek gehef om die administratiewe koste verbonde aan die verwerking en keuring van aansoeke te dek.
• Bank: Absa; Rekeningnaam: Kunste Onbeperk; Rekening #: 406 333 5414; Takkode: 632 005; Verwysing: Jou stalletjienaam.
• LET WEL: Geen aansoek sal verwerk word alvorens die administrasiefooi nie betaal is nie.
• Aansoeke wat ná die sluitingsdatum van 28 Februarie 2026 ontvang word, sal slegs verwerk word indien daar steeds uitstalspasie beskikbaar is en daar voldoen word aan die vereistes soos hier bo uiteengesit, wat die betaling van die administrasiefooi insluit.
• ’n Maksimum van drie (3) stalletjies sal per eienaar toegeken word.

HEG DIE VOLGENDE DOKUMENTASIE AAN BY JOU AANSOEK

Algemene stalletjies

• Afskrif van jou identiteitsdokument of geldige werkspermit (indien nie ’n Suid-Afrikaanse burger nie).
• Voldoende visuele materiaal vir keuringsdoeleindes, bv. sosiale media-skakels of kleurfoto’s (selfs indien jy reeds voorheen by die KKNK uitgestal het).
• Bewys van betaling van die administrasiefooi (R350). Stalletjienaam moet as verwysing gebruik word.
• Geldige SAMRO-lisensie, waar van toepassing.
• Afskrif van ’n tweedehandse handelaar-sertifikaat, waar van toepassing.
• Tweedehandse handelaars moet aansoek doen vir ’n tydelike tweedehandse verkope-sertifikaat [SAPS601(D)] vir die KKNK. Kontak adjudant-offisier D.W. Beer by 044 203 9199 met navrae.

Kos- en deli-stalletjies

Die bogenoemde voorwaardes geld, sowel as die volgende:

• Afskrif van ’n geldige geskiktheidsertifikaat vir voedsel van jou eie munisipaliteit. Indien nie uitgereik deur die Tuinroete Distriksmunisipaliteit nie, moet jy ’n addisionele geskiktheidsertifikaat van hulle verkry, om by die KKNK met voedsel handel te dryf.
• Afskrif van ’n geldige gas-sertifikaat, waar van toepassing.
  
  

STALLETJIEHUUR 

• Stalletjiehuur is vir die duur van die fees en pryse sluit BTW in. ’n Basiese kragpunt word ingesluit by die koste, soos aangedui. Hierdie kragpunt is slegs vir gebruik van ’n kaartmasjien, lig, waaier en selfoonlaaier. Indien meer elektrisiteit benodig word, dui dit asseblief só onder addisionele dienste op die aansoekvorm aan.

INFRASTRUKTUUR VAN STALLETJIES 

• Stalletjies in tente word van mekaar geskei deur ’n raam van 32mm staalpype. Die konstruksie is ±2m hoog en het geen dwarspype of grond- bedekking nie. Afskortings is jou eie verantwoordelikheid. Die struktuur kan ongeveer 50kg dra.
• Die KKNK voorsien slegs uitstalruimte aan buite-stalletjies en geen ander infrastruktuur nie.
• Daar moet voorsiening gemaak word vir skadu vir alle buite-stalletjies, en dit moet voorsien word by alle oop ruimtes buite die tente.
• Stalletjiehouers se infrastruktuur moet netjies, skoon en in ’n goeie toestand wees.
• Sleepwaens moet as deel van alle uitstalruimtes ingereken word, of dit moet verwyder word na ’n veilige parkeerarea. Geen sleepwaens mag in die oop ruimtes tussen tente gestoor word nie (die KKNK het die reg om dit te verwyder indien stalletjiehouers nie aan hierdie vereistes voldoen nie).
• Indien ’n stalletjiehouer die eiendom of infrastruktuur wat deur die KKNK verskaf word beskadig, sal die stalletjiehouer verantwoordelik gehou word vir die algehele vervangingskoste daarvan. Die KKNK sal ’n faktuur aan die stalletjiehouer uitreik, wat binne 30 dae ná die uitreikingsdatum betaal moet word.

GROOTTE VAN STALLETJIES 

• Die presiese grootte van stalletjies word in die meegaande tabel aangewys. Jou uitstalruimte moet jou tentpenne en/of konstruksie (sleepwa/woonwa-haak) asook jou naamborde insluit. Buite-stalletjies moet hul presiese grootte aandui. Die KKNK aanvaar nie verantwoordelikheid vir die verskaf van enige foutiewe inligting oor stalletjiegroottes en -beskrywings tydens die aansoekproses nie. As sulks sal geen stalletjies tydens die fees verskuif word nie. In die geval waar stalletjies groter is as die voorgeskrewe grootte, behou die KKNK die reg voor om ’n beslissing te maak oor die aantal stalletjies wat die aansoeker se behoefte ten beste sal akkommodeer, die toepassing waarvan teen addisionele koste vir die stalletjiehouer sal beloop. Stalletjiehouers mag alleenlik handel dryf binne hul uitstalspasie.

KEURING EN VERWITTIGING 

Keuring vind deurentyd plaas, mits daar aan die volgende vereistes voldoen word:

• Aansoekvorm korrek en volledig voltooi.
• Alle vereiste dokumentasie saam met die aansoekvorm ingehandig is.
• Die administrasiefooi ten volle betaal is.

Die besluit van die keuringskomitee sal per e-pos gekommunikeer word. Keuring en verwittiging sal deurentyd plaasvind in aanloop tot die fees.

FINANSIËLE STELSEL: FEESMARK-STALLETJIEHOUERS

Indien die KKNK ’n finansiële-stelsel implementeer, onderneem ek om daarvan gebruik te maak.  

VRYWARING 

Ek aanvaar dat:

• ’n Nie-terugbetaalbare administrasiefooi van R350 vir my stalletjie-aansoek betaalbaar is.
• Die KKNK moontlik ’n spesifieke betaaltoestel aan my sal voorsien wat vir alle kaarttransaksies gebruik moet word, en dat die transaksiekoste vir sodanige transaksies ’n sekere persentasie sal beloop. 
• Ek bly te alle tye verantwoordelik vir die betaling van enige uitstaande balans van my stalletjiefooi.
• Ek aanvaar dat die KKNK die reg voorbehou om enige stalletjiehouer wat nie voldoen aan die betaalstelsel of ander bepalings en voorwaardes van die KKNK nie, te waarsku, te beboet of te vra om die perseel te verlaat.
• My stalletjie-aansoek(e) voor die aanvaarding van die kontrak(te) deur my of die KKNK gekanselleer kan word.