fbpx

KKNK Mothership Sessions-musiekreeks: Emo Adams UNPLUGGED

Met gaskunstenaars, Omar Adams en Rotas The Rapper
Donderdag 6 Augustus om 20:00

Emo Adams is een van Suid-Afrika se grootste en mees inspirende musieksterre. Hy is die huidige aanbieder van die immergewilde program Noot vir Noot op SABC2 en is ook die aanbieder en uitvoerende vervaardiger van Maak my Famous op kykNET. Sy merkwaardige talent is iets waaraan hy hard werk sedert die ouderdom van nege, waar hy op die Kaapse Vlakte grootgeword het.

Die konsert is UNPLUGGED met ’n vierstuk-orkes en Adams se pa, Omar “Boeta Maan”, sluit ook by hom aan vir ’n liedjie of twee. Die talentvolle jong kletsrymer, Rotas The Rapper maak ook sy verskyning in hierdie baie spesiale KKNK Mothership Studios-konsert.

Emo Adams vertel dat hierdie vertoning vir hom baie na aan die hart lê: “Die Mothership produksie-span se fokus was 100% op die kunstenaars en dit bied ’n meer intieme ervaring as jou gewone lights, camera, action. Dit herinner my aan die MTV Unplugged Sessions – die gehoor leer die kunstenaars op ’n meer gestroopte vlak ken. Ek dink mense gaan verras wees want dis ’n kant van my wat ek nie aldag wys nie.”

Dit is ook vir Emo ’n eer om saam met sy pa op te tree. “Ons sing eintlik baie min saam op ’n verhoog. Een van die liedjies wat ek en hy in die show doen is O Vader, `n liedjie wat my pa self geskryf het op die musiek van Il Mondo. Hy het dit verwoord uit iemand anders se perspektief – iemand wat koud kry op die strate en vir God vra om asseblief na ons kinders te kyk. Hierdie liedjie is vir my op verskeie vlakke betekenisvol. Ek is self ’n pa en ons werk ook beide baie met kinders. Ek het my liefde om jong talent aan te moedig van my pa gekry.”

Een van die jong kunstenaars wat Emo graag aanmoedig is Rotas The Rapper, wat ’n groot indruk op hom, en die kykers gemaak het in die onlangse reeks van Maak my Famous. Dié jong kunstenaar maak ook ’n verskyning in dié heerlike konsert. Emo sê dat Rotas The Rapper beslis ’n kunstenaar is om dop te hou: “Hierdie ou gaan golwe maak. En ek staan al die pad agter hom.”

Die groep wat saam met Emo Adams optree is ook almal goeie vriende en verleen ’n soomlose, afgeronde gevoel aan die vertoning.  Sean de Vries is die musiekregisseur en ook op baskitaar, Lance Rhoda is op cajon, Brynne Bailey op klavier en August West speel die saxofoon.

Die KKNK Mothership Sessions se uitvoerende vervaardiger, Carien Loubser sê: “Dis ’n besonderse ding as musikante weer bymekaar kom nadat hulle vir lank nie kon optree of musiek maak nie. Hierdieshow wys ’n rou, eerlikheid van Emo en die musikante wat saam met hom optree.”

Moet hierdie buitengewone konsert nie misloop nie. Kry jou kaartjies by WEBTICKETS.

HOE OM DIE VERTONING TE KYK: (Twee maklike stappe!)

  1. Jy koop ’n kaartjie presies soos wat mens ’n kaartjie vir ’n gewone konsert sou koop, by WEBTICKETS. (Jy moet ’n profiel skep, en jou kontakbesonderhede invul). 
  2. Op die aand van die vertoning, skakel jy weer in op WEBTICKETS, gaan na My Account, en kliek dan op My TicketsHier sal ’n skakel wees wat 20:00 live gaan. Kliek dan op die skakel – die player sal outomaties oopmaak en jy kan die vertoning kyk. 

So maklik soos dit.

Die konsert is beskikbaar om te kyk vanaf 6 Augustus om 20:00 tot Sondag 9 Augustus om midderrnag.

Meer inligting, en die volledige program vir die KKNK Mothership Sessions-musiekreeks is beskikbaar byhttp://www.kknk.co.za/kknk-mothership-sessions/

Musiekliefhebbers kan ook met die aankoop van kaartjies ’n donasie aan die Tribuo-fonds maak. Dié hulpfonds is gestig om betrokkenes in die uitvoerende kunste tydens die Covid-19-pandemie te ondersteun. Meer inligting is beskikbaar by https://www.kknk.co.za/

Kunstenaarsnavrae:
Liny Kruger
E-posadres: liny@mweb.co.za
Selfoonnommer: 082 464 1926

Vir medianavrae:         
Hugo Theart
E-posadres: hugo@kunste.org.za
Selfoonnommer: 083 324 2445

Kortom se eerste kortfilms binnekort op Netwerk24 te sien

Netwerk24 en die KKNK se eerste kortfilm-projek, Kortom, sien op Dinsdag 4 Augustus die lig.

Kortom deel die top nege kortfilms, gekies uit 81 inskrywings, met Netwerk24-intekenare. Alle inskrywings is deur ’n paneel gelees, sonder inligting oor betrokkenes, waarna ’n kortlys opgestel en finaliste gekies is. Kykers kan uitsien na vier komedies, drie dramas, ’n riller en ’n nie-verbale dansfilm.  

Die paneellede was Laetitia Pople, Wayne Muller, Ilse Klink, Jody Abrahams, Nini Conradie en Anika Pieterse.

Die vervaardiging van die films is ook onderhewig aan spesifieke maatreëls, wat die betrokkenes se kreatiwiteit verder uitdaag. Kortom is gekonsepsualiseer om binne die beperkings van die grendelstaat se maatreëls te geskied. Die films mag geen profesionele toerusting gebruik nie en mag alleenlik van natuurlik klank en beligting gebruik maak. Die films mag net op ‘n slimfoon en/of webkamera geskiet word en die films moet binne twee dae geskiet word. 

Volgens Pople het die inskrywings haar verras. “Die inskrywings het my weereens laat dink oor die rol van die kunste in ons wêreld. Ons kunstenaars is soos gebruiklik diep betrokke by die lewe en die samelewing. Hulle laat ons lag en huil in ewe maat. Tog skroom hulle nie om ons te help om anders oor moeilike sake te dink nie”, sê sy. Pople meen verder dat kunstenaars – in dié geval rolprentmakers – ’n belangrike rol in ons nuwe werklikheid vervul. “Hulle wys ons hoe om met die hart en die siel te leef en te oorleef.”

Klink sê die standaard van die inskrywings was van ’n baie hoë gehalte. “Die skrywers was baie kreatief en het uit die boks gedink, wat die stories baie opwindend en insiggewend gemaak het. Regisseurs en skrywers gaan nou verder kreatief moet wees, om met die maatreëls en beperkings wat tans in plek is, produksies van uitstaande gehalte te vervaardig. Daar is voorwaar iets vir elke smaak in die nege stukke wat gekies is”, sê sy.

Muller sê daar was heelwat goeie draaiboeke met boeiende stories wat in lewendige Afrikaans geskryf is. “Om ’n draaiboek te lees is een ding, maar ek sien veral uit om te sien hoe die kunstenaars dit kreatief laat lewe”, vertel hy.

Vir Pieterse was die gehalte en kreatiwiteit van die inskrywings net wéér bewys dat Suid-Afrikaanse filmmakers vir niemand in die wêreld hoef terug te staan nie. “Netwerk24 skep verder deur hierdie projek vir rolspelers in die kunste werk – ’n bedryf wat swaar deur die Covid-19-pandemie geraak is.”

Vier komedies is as finaliste gekies, waaronder Voetjie Voetjie geskryf deur Nico Scheepers; Kortpad geskryf deur Gaerin Hauptfleisch; Nappy Blues geskryf deur Carla Smith en Stuur groete vir Fanie geskryf deur Marelize Viljoen. Drie dramas is ingesluit: Markus en die son uit die pen van Philip Rademeyer; ’n Dag vir ’n oomblik uit die pen van Hilléthe Möller en Die Dans Engel uit die pen van Vinette Ebrahim. Die laaste twee kortfilms is ’n riller, Ter nagedagtenis, deur Soné Rossouw en Vasgevang, ’n dansproduksie gekonseptualiseer deur Figure of 8 Dance Collective. 

Kykers kan uitsien na verskynings deur onder andere Cintaine Schutte, Waldemar Schultz, Roeline Daneel, Theo Jantjies, Albert Pretorius, Richard September, Brendon Daniels, Wilhelm van der Walt, Gerben Kamper, Kevin Narain, Fiaz Dalman en vele ander.

Daar word vanaf 4 Augustus elke Dinsdag een kortfilm op Netwerk24 beskikbaar gestel.

KKNK en Mothership Studios bied unieke aanlyn musiekreeks aan

Die Klein Karoo Nasionale Kunstefees (KKNK) en Mothership Studios bied vanaf Donderdag 30 Julie tot Donderdag 24 September ’n eksklusiewe musiekreeks aan wat musiekliefhebbers in die gemak en veiligheid van hulle huise kan geniet. Hierdie aanlyn reeks bevat optredes deur van ons land se voorste musikante en vermaaksterre, soos hulle nog nie sedert die nasionale inperking gesien is nie.

“Die KKNK is trots om die Mothership Sessions, ondersteun deur Netwerk24, aan te bied. Dit is vir ons belangrik om steeds in hierdie tyd produksies van hoogstaande gehalte na ons gehore te bring. Elke konsert is ’n besonderse en unieke ervaring, wat deur die vervaardigers van onder meer die Republiek van Zoid Afrika opgeneem is.” So sê Hugo Theart, artistieke direkteur van die KKNK.

Theart sê verder dat alhoewel die KKNK nie vanjaar feesgangers op Oudtshoorn kon verwelkom nie, hulle steeds die gees van die fees na gehore se huise kan bring. “Musiekliefhebbers, oud en jonk, gaan beslis hierdie reeks van eksklusiewe optredes geniet. Verskeie musiekgenres – van rock tot country, is ingesluit, gehalte-vermaak vir die hele gesin”, brei hy uit. 

Die Mothership Sessions-optredes is in Karen Zoid se studio opgeneem. “Niks sal ’n lewendige konsert in ’n stadion, ’n arena, of in ’n teater kan vervang nie, maar inperking het ons almal forseer om anders na dinge te kyk. Dis nie noodwendig ’n slegte ding nie, dis net anders. Daar sal heel waarskynlik nie weer in die nabye toekoms enige live shows aangebied kan word nie, maar dit verhoed ons nie om steeds musiek vir ons mense te maak nie. Ontvlugting is noodsaaklik vir oorlewing en ek en my musiek-kollegas wil hê mense moet hulle skoene uitskop en vergeet van die pandemie wat ons gedagtes oorheers”, verduidelik Zoid.

Elandré skop die eerste Mothership Sessions-musiekreeks op Donderdag 30 Julie af. Dié boorling van Despatch in die Oos-Kaap het Suid Afrika se harte gesteel met sy debuutalbumKleindorp-Dromer en sy kenmerkende diep stem. Met ’n vyfstuk-orkes gaan hy skerms aan die brand sing.

“Al kan ons nie tans in ’n teater saamkom nie, sal goeie musiekkonserte altyd sorg vir hoendervleis-oomblikke. Dink maar aan die legendariese musiekopnames van Kurt Cobain, Paul McCartney en Elton John, om ‘n paar te noem, wat dekades later steeds geniet en onthou word. Dit is wat ons met die KKNK Mothership Sessions wil vermag”, sê Carien Loubser, vervaardiger van hierdie musiekreeks. “Ek stel goeie kwaliteitprogramme met top-gehalte tegniese versorging en hoë produksiewaarde hoog op die spel, en ons musiekreeks sal daarom tuis wees tussen enige top-televisiemusiekprogramme. Ons hoop om met tyd al die kunstenaars wat ons Suid-Afrikaanse musieklandskap opmaak, as deel van dieMothership Sessions-reeks op te neem”, sluit Loubser af.

Ander musiekkonserte in hierdie reeks sluit in Emo Adams Unplugged op Donderdag 6 Augustus. Dit is ’n uitsonderlike ervaring met Adams en ’n vierstuk-orkes, waaronder klavier, saksofoon en kitaar. Sy pa, Omar, sluit ook by hom aan vir ‘n liedjie of twee.

’n Besonderse optrede deur Karen Zoid word op Maandag 10 Augustus aangebied. Zoid word vir hierdie optrede – op haar verjaarsdag – begelei deur haar band, asook Theo Crous, hoofkitaarspeler van die legendariese Springbok Nude Girls.

Suid-Afrika se top indie-rockgroep, Watershed (Donderdag 20 Augustus) is een van die land se gewildste uitvoerprodukte. Hulle optrede beloof fantastiese musiek, waaronder ’n hele paar van hulle ikoniese treffers.

Die Afrikaanse liedjieskrywer Jan Blohm (Donderdag 27 Augustus) is te sien in die show van ’n leeftyd: meesleurend, rou en eerlik, net soos sy musiek.

Elvis Blue (Donderdag 3 September) bied ’n sielvolle vertoning aan met van sy gewildste liedjies waaronder Die Hemel, Jou HuisToe ons Jonk Was en Lighthouse

Op Donderdag 10 September betower Anna Davel kykers met ’n musikale reis van akoestiese klavier, saksofoon en melodieë. Sy sing van haar eie liedjies, sowel as musiek deur van die grootste legendes van ons tyd.

Die opkomende ster Roan Ash (Donderdag 17 September) kombineer folk-musiek, blues, country en rock met sy strelende melodieë en lirieke. Sy platinum-album, Whisky to My Soul, is genomineer vir ’n SAMA in die kategorie Beste Kontemporêre Album.

Op Donderdag 24 September sluit Eet Kreef! die eerste Mothership Sessions op ’n hoë noot af. Johannes Kerkorrel en die Gereformeerde Blues Band se ikoniese album word 30 jaar nadat dit oorspronklik uitgereik is gevier. Met aKING se hoofsanger Laudo Liebenberg, ’n vuurwarm band en nuwe verwerkings van ikoniese songs soos Energie, Hillbrow, Hoe ek voelen al die treffers wat van dié plaat ’n kultustreffer gemaak het, sorg hierdie show vir meer as een hoendervleis-oomblik. 

Optredes sal elke Donderdagaand aanlyn uitgesaai word en tot daardie Sondag beskikbaar wees om te kyk, met Karen Zoid se konsert op Maandag 10 Augustus. Musiekliefhebbers van regoor die wêreld kan inskakel vir die Mothership Sessions-reeks en elke konsert in hoë-definisie geniet. Kaartjies kos slegs R150 per konsert – vir die hele gesin om saam te geniet – en is beskikbaar op www.webtickets.co.za, vanwaar die optredes ook gekyk kan word op ’n baie gebruikersvriendelike platform.

Musiekliefhebbers kan ook met die aankoop van kaartjies ’n donasie aan die Tribuo-fonds maak. Dié hulpfonds is gestig om betrokkenes in die uitvoerende kunste tydens die Covid-19-pandemie te ondersteun. Meer inligting is beskikbaar op www.kknk.co.za.

KKNK2020-kaartjies – Hoe nou gemaak?

Aan alle kaartjiekopers: dankie vir die ondersteuning van die kunste en KKNK2020!

Die kunstefees is gekanselleer en ongelukkig kan jy nie meer jou gunsteling-kunstenaars in die Klein Karoo op die verhoog sien nie. Maar KUNS leef voort. In allerhande innoverende vorms en gedaantes. En die KKNK maak reeds planne vir die toekoms.

Read More

KKNK not going ahead as planned

In light of growing concerns about the COVID-19 pandemic (also known as the Corona virus), the management and board of the Klein Karoo National Arts Festival have decided that this festival in Oudtshoorn will not continue as planned from 23 to 29 March 2020.

Read More

Kunste Onbeperk vereer rolspelers in die Kunste

Vyf rolspelers is deur Kunste Onbeperk vereer vir hul bydrae tot die kunste in Suid-Afrika. Die geleentheid het op 16 Januarie 2020 by die Zeitz MOCAA (Museum of Contemporary Art Africa) in die V&A Waterfront plaasgevind. Kunste Onbeperk bied jaarliks die Klein Karoo Nasionale Kunstefees (KKNK) aan. Vanjaar se fees vind van 23 tot 29 Maart op Oudtshoorn plaas.

Read More
Privacy Settings
We use cookies to enhance your experience while using our website. If you are using our Services via a browser you can restrict, block or remove cookies through your web browser settings. We also use content and scripts from third parties that may use tracking technologies. You can selectively provide your consent below to allow such third party embeds. For complete information about the cookies we use, data we collect and how we process them, please check our Privacy Policy
Youtube
Consent to display content from Youtube
Vimeo
Consent to display content from Vimeo
Google Maps
Consent to display content from Google